Ásakar CCP um ofmetnað og hroka

Ítarlega er fjallað um mislukkaða þróun tölvuleiksins World of Darkness og fjöldauppsagnir CCP í Bandaríkjunum í apríl í grein sem birtist á vef The Guardian í dag. Nick Blood, fyrrverandi leikjahönnuður CCP, tjáir sig þar um hvers vegna þróun tölvuleiksins, sem hætt var við eftir níu ára starf, fór úrskeiðis.

Blood segir framleiðsluferli World of Darkness, sem beðið var með mikilli eftirvæntingu í tölvuleikjaheiminum, hafa einkennst af ofmetnaði og skipulagsleysi. Í greininni segir að leikurinn hafi þrisvar sinnum náð hinu svokallaða „Alpha“-stigi, þegar gengið hefur verið frá leiknum í aðalatriðum, en að í hvert sinn hafi verið hætt við útgáfu leiksins og vinna hafist á ný.

Blood gagnrýnir það sérstaklega að starfsmenn sem unnu að þróun World of Darkness hafi oft verið færðir um set og látnir vinna að EVE Online, flaggskipi CCP, í staðinn. Þá hafi fyrirmæli yfirmanna verið óskýr og ákveðin atriði í leikjunum oft skilin eftir ókláruð. Í greininni segir einnig að hroki hafi ríkt innan fyrirtækisins eftir jákvæða umfjöllun í blaðinu New York Times.

Hann fer hörðum orðum um þá ákvörðun stjórnenda CCP að rukka EVE-spilara næstum átta þúsund krónur fyrir einglyrni á persónur sínar í leiknum. Hann er ekki síður ósáttur með afsökunarbeiðni Hilmars Veigars Péturssonar, framkvæmdastjóra CCP, í kjölfarið en Blood segir að handritshöfundar fyrirtækisins hafi verið fengnir til að skrifa hana fyrir hann.

Framleiðslu World of Darkness var endanlega hætt nú í apríl, en í greininni segir að verkefninu hafi í raun lokið þegar CCP neyddist til að segja upp tuttugu prósent starfsliðs síns seinni part ársins 2011.

Eins og greint hefur verið frá lagði tölvuleikjaframleiðandinn niður 49 störf í dag, þar af 27 á Íslandi.