CCP segir upp 49 starfsmönnum

Tölvuleikjaframleiðandinn CCP hefur lagt niður 49 störf hjá fyrirtækinu og þar af 27 í höfuðstöðvunum í Reykjavík.

Í tilkynningu CCP segir að skipulagsbreytingarnar séu liður í áherslubreytingum fyrirtækisins í vöruþróun, þar sem lögð sé áhersla á þróun og útgáfu tölvuleikja fyrir einn og sama leikjaheiminn, Eve veröldina. Breytingarnar varði útgáfustarfsemi CCP og hafi ekki áhrif á leikjaþróun fyrirtækisins. CCP veiti öllum fráfarandi starfsmönnum stuðning og aðstoð við atvinnuleit.

„Það er okkur þungbært að kveðja hæfileikaríkt starfsfólk okkar og vini. Fólk sem hefur lagt sitt af mörkum til fyrirtækisins og skilað mjög góðri vinnu við útgáfustarfsemi þess. En í ljósi breyttra aðstæðna, og stefnubreytinga í vöruþróun fyrirtækisins, er ég sannfærður um að þessar skipulagsbreytingar muni til lengri tíma litið styrkja og efla starfsemi CCP,“ segir Hilmar Veigar Pétursson, framkvæmdastjóri fyrirtækisins í tilkynningunni.

Í aprílmánuði lagði fyrirtækið niður 56 stöðugildi í starfsstöð CCP í Atlanta þegar þróun á tölvuleiknum World of Darkness var hætt. Leikurinn hafði verið í vinnslu á skrifstofu fyrirtækisins í Atlanta í Bandaríkjunum frá árinu 2009. Í tilkynningu CCP um ákvörðunina kom fram að fyrirtækið myndi framvegis einbeita sér að leikjum sem eiga sér stað í EVE-heiminum, það er Eve Online, Valkyrie og Dust 514.

Fyrirtækið tapaði 21,3 milljónum Bandaríkjadala á síðasta ári, eða um 2,4 milljörðum króna. Það var í fyrsta sinn sem bókfært tap hefur verið á rekstrinum.