Del Bosque ósáttur við að samtali sínu við Pique var lekið

Vicente del Bosque, landsliðsþjálfari spænska karlaliðsins í fótbolta, er afar ósáttur við að upptaka af samtali hans og miðvarðarins Gerards Pigue hafi verið birt.

Á henni ræða þeir málefni Cesc Fábregas en Pique var að segja þjálfaranum að miðjumaðurinn væri á leið frá Barcelona.

„Við verðum að verja Cesc svolítið. Hann sagði mér að það væri búið að ganga frá þessu. Hann er að fara fyrir 33 milljónir Evra,“ sagði Pique við þjálfarann áður en blaðamannafundurinn hófst.

Þetta átti enginn annar að heyra og hélt miðvörðurinn fyrir munninn á sér. Samt sem áður náðist þetta á upptöku og var hún spiluð í spænskum fjölmiðlum.

„Mér finnst ósanngjarnt að samtalinu hafi verið lekið,“ sagði Del Bosque við Radio Marca.

Talið er að Chelsea og Manchester City hafi bæðið boðið Barcelona 33 milljónir Evra fyrir Fábregas og hann íhugi nú til hvors liðsins hann ætli.