Rauða stjarnan í bann

Rauðu stjörnunni frá Belgrad hefur verið bönnuð þátttaka í Meistaradeild Evrópu á næsta tímabili vegna brota á fjárhagsreglum UEFA, evrópska knattspyrnusambandsins. Félagið hefur tíu daga til að áfrýja banninu.

Rauða stjarnan varð serbneskur meistari í vor og tryggði sér þar með sæti í forkeppni Meistaradeildarinnar, en nú er ljóst að ekkert verður af þeirri þátttöku. Erkifjendurnir í Partizan Belgrad taka sæti Rauðu stjörnunnar í Meistaradeildinni.

Rauða stjarnan er eina liðið frá Austur-Evrópu sem hefur orðið Evrópumeistari meistaraliða. Það gerðist vorið 1991, um það leyti sem stríðið í gömlu Júgóslavíu var að brjótast út.