Leik Englands og Hondúras hætt

Vináttulandsleikur Englands og Hondúras í Miami hefur verið flautaður af, allavega um stundar sakir, vegna þrumuveðurs.

Liðin höfðu leikið í 23 mínútur þegar dómarinn Ricardo Salazar flautaði leikinn af og gekk með liðunum til búningsherbergja. Staðan var markalaus þegar þetta gerðist.

"Þetta kom okkur á óvart, þetta gerist ekki oft í Evrópu," sagði Roy Hodgson, landsliðsþjálfari Englands, en hann sagðist skilja ákvörðun dómarans. "Við verðum að virða ákvörðun dómarans því hann setur öryggi leikmannanna í forgang."

Í samtali við ITV sagðist Salazar ætla að taka stöðuna á nýjan leik eftir hálftíma, hvort þá væri óhætt að hefja leik að nýju.