Tvíburasystur leiddust út úr móðurkviði

Tvíburasystur sem fæddust í Ohio í síðustu viku leiddust út úr móðurkviði. „Mér fannst stórkostlegt að þær héldust í hendur, alveg ótrúlega fallegt,“ sagði móðir þeirra, Sarah Thislethwaite og bætti við:

„Þær eru strax orðnar bestu vinkonur.“

Meðgangan reyndist henni erfið, en sjaldgæfur kvilli hafði áhrif á hana. Kvillinn er þannig að tvíburar deila sama líknarbelg og sömu fylgju. Kvillinn eykur líkurnar á að naflastrengurinn flækist utan um annað barnið.

En allt er gott sem endar vel, stúlkurnar komu algjörlega heilbrigðar úr móðurkviði.

„Ég er svo ánægð að þær eru heilbrigðar,“ sagði Sarah glöð í bragði við fréttamenn í Bandaríkjunum. 

Fæðingakvillinn sem hrjáði móðurina á meðgöngunni er kallaður „Mono Mono“ og hefur áhrif eina meðgöngu af hverjum tíu þúsund. Dr. Melissa Mancuso, sem tók á móti stúlkunum, segist aðeins hafa séð örfá tilfelli þar sem tvíburar lifi af slíka meðgöngu.