Welbeck: Van Gaal er frábær þjálfari

Danny Welbeck segist spenntur fyrir samstarfinu með Louis van Gaal, nýráðnum knatspyrnustjóra Manchester United.

"Ég var mjög ánægður þegar ég heyrði að van Gaal hefði verið ráðinn," sagði Welbeck.

"Hann er frábær maður og frábær þjálfari. Þegar þú lítur yfir ferilskránna hans sérðu að hann hefur þjálfað mörg af bestu liðum álfunnar."

Welbeck er í enska landsliðinu sem leikur á HM í Brasilíu í sumar. Hann kveðst fullur tilhlökkunar fyrir átökum sumarsins.

"Þetta er mjög spennandi fyrir alla hlutaðeigandi, en sérstaklega fyrir yngri leikmennina, því þetta verður þeirra fyrsta mót. Þú verður að vera með fæturna á jörðinni, halda einbeitingu og spila þinn leik.

"Ég vil sanna mig og sýna bæði sjálfum mér og heimsbyggðinni hvers ég er megnugur. HM er risastórt mót og ég get ekki beðið eftir því að það hefjist," sagði Welbeck að lokum.