Hitti belgíska landsliðið í Stokkhólmi | Fór yfir málin með Fellaini

Þórdís Hrönn Sigfúsdóttir, fyrrverandi leikmaður Breiðabliks sem leikur nú sem atvinnumaður með Älta í sænsku B-deildinni í fótbolta, hitti stjörnur belgíska landsliðsins í kvöld.

„Ég var að fara að keppa á móti Djurgården með Älta og þar var belgíska landsliðið að æfa á undan okkur,“ segir Þórdís í samtali við Vísi en Djurgården leikur heimaleiki sína á Ólympíuvellinum í Stokkhólmi.

Belgíska landsliðið er við æfingar í Svíþjóð en það mætir heimamönnum í vináttulandsleik á sunnudaginn á Vinavöllum í Stokkhólmi.

„Ég hitti Januzaj, Fellaini, Hazard og Lukaku og fékk mynd með þeim. Januzaj var svolítið feiminn en Fellaini nennti þessari myndatöku ekkert. Hazard var mjög yndislegur,“ segir Þórdís en Fellaini átti vægast sagt dapra leiktíð með Manchester United í vetur.

„Ég var aðeins að kenna honum að spila fótbolta. Það er vonandi að hann hafi lært eitthvað,“ segir hún og hlær.

Það var sannkallaður stjörnufans á Ólympíuvellinum í Stokkhólmi í kvöld því brasilíska knattspyrnukonan Marta var á meðal áhorfanda á leik Älta og Djurgården.

„Besta vinkona hennar, Elaine, var að spila sinn síðasta leik en hún er að hætta í fótbolta. Því miður gátum við ekki kvatt hana með sigri. Við komust 2-0 yfir en gerðum jafntefli, 2-2,“ segir Þórdís Hrönn Sigfúsdóttir.