Innlent

Deilt um úthutun hjúkrunarrýma á Suðurlandi

Magnús Hlynur Hreiðarsson skrifar

Bæjarstjóri Hveragerðisbæjar segir það óskiljanlega ákvörðun að ákveðið hafi verið flytja ný hjúkrunarrými frá Árnessýslu á önnur svæði á Suðurlandi því í sýslunni bíði þrettán manns, allt veikt fólk í brýnni þörf að komast inn á hjúkrunarheimili.

Aldís Hafsteinsdóttir, bæjarstjóri Hveragerðisbæjar er ekki hress þessa dagana þegar litið er á stöðu hjúkrunarrýma í Árnessýslu því plássunum fækkar og fækkar á meðan biðlistarnir lengjast.

Um miðjan apríl voru tekin 4 hjúkrunarrými af Kumbaravogi á Stokkseyri fyrir tilstuðlan sveitarstjórnarmanna í Árnessýslu sem vildu koma þessum rýmum í notkun fyrir íbúa sýslunnar.

Óskað var eftir því við ráðuneyti heilbrigðismála að tvö rými yrðu flutt á Sólvelli á Eyrarbakka og tvö að Ási í Hveragerði þar sem að ónotuð herbergi voru tilbúin og því hægt að taka strax inn í þessi rými. Af einhverju ástæðum ákveður svo heilbrigðisráðuneytið að nýta einungis tvö af þessu rýmum í Árnessýslu nánar tiltekið á Sólvöllum á Eyrarbakka en ganga fram hjá Ási í Hveragerði. Á sama tíma var fjölgað um 6 hjúkrunarrými í Rangárþingi en 1 dvalarrými tekið í staðinn.

En hvað er nýjast í málinu í dag ?
„Það gáfust möguleikar á að auka fjölda hjúkrunarrýma hér í Árnessýslu um fjögur en þess í stað þá eru tvö sett hingað og tvö sett annað. Okkur finnst þetta mjög sérstakt, sérstaklega í ljós þess að hér eru langir biðlistar og brýnt að brugðist sé við þeim,“ segir Aldís.

Hún segir að sveitarstjórnarmenn í Árnessýslu sætti sig ekki við biðlistann.

„Nei, alls ekki og við óskum skýringa, við viljum fá skýringar frá þeim sem þarna hafa ákveðið þetta, hvers vegna eru tekin hjúkrunarrými frá því svæði þar sem þörfin er hvað brýnust og sett annað,“ bætir hún við.

En af hverju heldur hún að svona gerist ?

„Ég get ekki svarað því, ég hreint skil það ekki, þetta er að mínu mati óskiljanleg ákvörðun.“
Aldís gagnrýnir þingmenn Suðurkjördæmis og á þessi skilaboð til þeirra.

„Fyrst og fremst óskum við svara, hvers vegna var þetta gert svona og með hvaða hætti á þá að bregðast við þeim vanda sem eftir stendur,“ segir hún.

Eru þingmenn Suðurkjördæmis að klikka í þessu máli ?

„Ég vona ekki, ég vona að við fáum skýringar á þessu og að sjálfsögðu búumst við því að við fáum aukningu á hjúkrunarrými því það er svo sannarlega þörf á því,“ segir bæjarstjórinn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.