54 lík hafa fundist í ferjunni

54 lík hafa fundist í ferjunni sem sökk í ánni Megna í Bangladess á fimmtudag eftir að leit var hafin að nýju.

Leitinni var hætt snemma í dag eftir að fjörutíu lík höfðu fundist en hundruð aðstandenda fólks sem enn var ófundið mótmæltu við árbakkann og því var leitinni haldið áfram.

Að sögn yfirvalda í Bangladess er tólf manns enn saknað en heildarfjöldi farþega er þó á reiki. Farþegalistar eru óalgengir í ferjum í Bangladess og algengt er að fjöldi farþega sé yfir leyfilegum mörkum.

Ferjan hefur verið dregin í land og haldið verður áfram að reyna að finna hina tólf sem enn er saknað.