Engar ferðir á tind Everestfjalls í ár

Leiðsögumenn á Everestfjalli hafa lagt niður störf og undirbúa nú brottför af fjallinu. Engar ferðir verða því á tind fjallsins það sem eftir er árs, en leiðsögumennirnir hætta störfum af virðingu við fallna félaga. Þrettán Sjerpar létu lífið í snjóflóði á Everestfjalli á föstudag og þriggja er enn saknað.

Tveir Íslendingar, þau Vilborg Arna Gissurardóttir og Ingólfur Axelsson, eru í grunnbúðum Everestfjalls en þau ætluðu bæði að komast á tindinn. Ingólfur segir í samtali við fréttastofu að fjallgöngufólkinu hafi ekki verið tilkynnt um verkfallið. Hann segist hafa trú á að deilan leysist, en Sjerparnir krefjast hærri launa og líftrygginga.

„Við erum hérna ásamt hundruðum annarra að bíða eftir að úr þessu leysist,“ segir Ingólfur. „Mér líður pínu eins og sjö ára krakka sem er sagt það verði engin jól. Þetta er lífsviðurværi Sjerpanna og slík ákvörðun skaðar starfsemina til frambúðar. Þannig að þetta mun leysast.“