Moyes: Lítil mistök urðu okkur að falli

Tímabilinu er svo gott sem lokið hjá David Moyes og drengjum hans í Man. Utd eftir að liðið féll úr leik í Meistaradeildinni í kvöld.

Man. Utd komst í flotta stöðu í kvöld er liðið komst 0-1 yfir gegn Bayern í kvöld en gætti ekki að sér og fékk mark beint í andlitið.

"Öllum skólastrákum er sagt að passa sig eftir að maður skorar. Það er nákvæmlega það sem gerist. Þeir vaða upp völlinn og jafna," sagði Moyes svekktur.

"Við hefðum þurft 5-10 mínútur til þess að jafna okkur. Annars gerðu leikmennirnir fátt rangt í kvöld. Þeir spiluðu vel en lítil mistök urðu okkur að falli.

"Við áttum möguleika í stöðunni 2-1 og þá kemur mark sem fer af okkar manni. Mér fannst við aldrei vera úr leiknum en heppnin var ekki með okkur er þeir skora þriðja markið."

Man. Utd verður ekki í Meistaradeildinni á næsta tímabili og það er því langt í Meistaradeildarbolta á Old Trafford.

"Það eru vonbrigði en nú þarf að koma liðinu í það stand að við getum komist í Meistaradeildina á nýjan leik."