Totti til í að spila á HM í sumar

Francesco Totti er til í að gefa kost á sér í ítalska landsliðið á ný, sjö árum eftir að hann hætti að spila með því.

Totti, sem er fyrirliði Roma á Ítalíu, gaf þetta út í dag en hann er 37 ára gamall. Hann hefur spilað vel með Roma í vetur sem er í öðru sæti úrvalsdeildarinnar þar í landi.

Hann varð heimsmeistari með Ítalíu árið 2006 og er til í að hjálpa Cesare Prandelli landsliðsþjálfara á HM í Brasilíu í sumar.

„Ég yrði mjög stoltur ef Prandelli myndi hringja í mig. Ég fæ bara eitt tækifæri til að spila á HM í Brasilíu á lífsleiðinni,“ sagði Totti við ítalska fjölmiðla í dag.

„En ég verð að sjá til hvernig líkaminn verður í lok tímabilsins. Það skiptir mestu máli,“ bætti hann við.

„Ég vona að landsliðið komist í úrslitaleikinn. Liðið hefur getuna til að ná langt.“