Sögðu hjónaband Jóhönnu og Jónínu viðurstyggilegt

Jóhanna Sigurðardóttir, fyrrverandi forsætisráðherra, lýsir viðbrögðum stjórnvalda í Úganda gagnvart hjónabandi hennar og Jónínu Leósdóttur í pistli sem birtist í Fréttablaðinu í dag. Hún segir að skilaboðin frá Úganda hafi verið þau að þær væru siðlausar og að hjónaband þeirra væri viðurstyggilegt.

Lögþing Úganda hefur samþykkt frumvarp sem herðir refsiramma fyrir samkynhneigð, svo mögulegt verði að setja samkynhneigða í lífstíðarfangelsi. Einnig gæti hver sem tilkynnir ekki samkynhneigða til lögreglunnar farið í fangelsi. Frumvarpið bannar einnig áróður eða réttindabaráttu samkynhneigðra.

Í pistlinum lýsir hún viðbrögðum Úgandamanna árið 2010 þegar samband hennar og Jónínu, einginkonu hennar, vakti heimsathygli. Þá hafi hún fengið ósmekkleg skilaboð frá yfirvöldum þar í landi.

Jóhanna talar einnig um að ótrúlegt sé að heyra fordómana og hvernig raunveruleikinn sé algjörlega afskræmdur, eins og þegar því er haldið fram að samkynhneigðir séu hættulegir samfélaginu, einkum og sér í lagi börnum.

„Já, staðan í Úganda er skelfileg og samkynhneigðir þar í landi hafa þurft að búa við hræðileg mannréttindabrot. Fyrir það eitt að elska aðra manneskju þurfa þeir að lifa í stöðugum ótta, sæta miskunnarlausu ofbeldi, grimmd, ofsóknum og kúgun. Og nú hefur lífstíðardómur fyrir samkynhneigð verið lögfestur í Úganda.“

Jóhanna telur að staðan í Úganda sé grafalvarleg.

„Lagasetningin hefur þegar haft þau áhrif að dauðalistar, svartir listar með persónuupplýsingum um hinsegin fólk, eru birtir í götublöðum í Úganda og birting þeirra hefur leitt til árása á þetta fólk og til sjálfsvíga samkynhneigðra.“

Hún segir að Alþjóðasamfélagið þurfi að bregðast miklu harðar við þessum hrikalegu mannréttindabrotum en það hefur þegar gert og þá séu Íslendingar ekki undanskildir.

„Fordæming utanríkisráðherra er ekki nægjanleg. Kröftug ályktun frá stjórnvöldum og Alþingi gegn þessum mannréttindabrotum væri fyrsta skrefið. Síðan þarf að koma frumkvæði stjórnvalda í samráði við önnur norræn ríki um hvernig best væri að beita sér fyrir breiðri alþjóðasamstöðu í málinu.“

Jóhanna bendir á að Íslandsdeild Amnesty International og Samtökin ‘78 standi fyrir sameiginlegu átaki og fjársöfnun í þágu samkynhneigðra í Úganda með glæsilegum stórtónleikum í Hörpu í kvöld.

„Vonandi styður íslenska þjóðin dyggilega þetta átak. Það væri til fyrirmyndar og myndi skipta miklu máli.“