Karlar greiða síður fyrir flug

Innanlandsflug er þjóðhagslega hagkvæmt og samfélagslegur ávinningur þess er afar mikill að mati höfunda skýrslu um félagshagfræðilega greiningu á áætlunarflugi innanlands, en skýrslan var kynnt í Iðnó fyrr í dag.

Hagkvæmnin er þó mismikil eftir flugvöllum og eru fimm, af þeim ellefu flugvöllum sem úttektin tók til, metnir óhagkvæmir.

Tilgangur úttektarinnar var meðal annars sá að meta áhrif flugvalla á lífsgæði landsmanna og að meta heildarkostnað hins opinbera og einstaklinga af innanlandsflugi, svo fátt eitt sé nefnt.

Ýmsar áhugaverðar upplýsingar koma fram í skýrslunni, til dæmis sú staðreynd að fleiri konur nota innanlandsflugið en karlar. Karlmenn greiða hinsvegar síður fyrir flugið sjálfir, en af þeim farþegum sem fljúga á vegum fyrirtækja eru 82% karlar.