Viðar Örn skoraði í sigri Valerenga

Viðar Örn Kjartansson var meðal markaskorara í sigri gegn Stabæk í norsku úrvalsdeildinni í dag. Markið í dag var annað mark Viðars í síðustu tveimur leikjum eftir að hafa ekki fundið netmöskvana í fjórum leikjum á undan því.

Þrátt fyrir að hafa ekki náð að skora mikið í síðustu leikjum er Viðar enn lang markahæstur í norsku úrvalsdeildinni. Viðar Örn hefur verið orðaður við fjöldan allra liða í Evrópu undanfarnar vikur.

Stabæk komst yfir í fyrri hálfleik en tvö mörk á skömmum tíma frá Ghayas Zahid og Viðari Erni komu Valerenga aftur yfir. Fredrik Brustad jafnaði metin skömmu síðar fyrir Stabæk með öðru marki sínu í leiknum en Zahid skoraði sigurmark Valerenga skömmu fyrir leikslok.

Valerenga skaust upp í 4. sæti norsku úrvalsdeildarinnar með sigrinum en félagið komst upp fyrir Rosenborg á hagstæðari markatölu.