Nýliðar á Fimmvörðuhálsi

Lilja Björk Baldursdóttir fór í sína fyrstu æfingaferð með Hjálparsveit skáta í Kópavogi um síðustu helgi, en hún hefur lengi haft áhuga á útivist og hentar hjálparsveitarstarfið henni því vel. „Ástæðan fyrir þessu brölti mínu, sem það er, þar sem ég er einstæð þriggja barna móðir og þetta tekur allan minn frítíma, er sú að ég fæ ómetanlega þjálfun í fjallamennsku þar sem okkur er kennt meðal annars að veita fyrstu hjálp, klifur, vetrarfjallamennska, snjóflóðaleit og rötun.“



Ferðin um helgina með hjálparsveitinni var á Fimmvörðuháls. Lagt var af stað klukkan sjö á laugardagsmorgun og gengið af stað um klukkan tíu. „Færið var ágætt um helgina. Ég gekk þarna síðast í júní og þá var meiri snjór. Núna var undirlagið harðara og til dæmis var mikið harðfenni í Bröttufönn þar sem við þurftum að leggja línu. Heljarkambur var líka mjög erfiður yfirferðar fyrir þá sem ekki voru með brodda undir skóm. Við komum niður í Langadal í myrkri þannig að við þurftum að nota höfuðljós síðasta spölinn sem var nokkuð krefjandi. Við hjálpuðum svo skálaverði að ganga frá skálanum í Langadal (Skagfjörðsskála) fyrir veturinn. Við vorum 35 manns í ferðinni og þar af voru fjórtán nýliðar en þeir sem fara í gegnum nýliðaþjálfun þurfa að verða sér úti um ýmsan búnað fyrir fjallaferðamennsku og vera komnir með allan búnað áður en þjálfun lýkur eftir átján mánuði,“ segir Lilja.

Hún segir félagsskapinn ekki vera síst mikilvægan þátt í hjálparsveitastarfinu. „Hópurinn er samheldinn og skemmtilegur. Mér finnst líka gott að geta gefið af mér til samfélagsins og tekið þátt í að hjálpa fólki sem lendir í erfiðum aðstæðum í lífinu. Það er alveg ótrúlega gefandi að öðlast þessa reynslu og að geta miðlað henni til samfélagsins á þennan hátt. Þessi þjálfun mun fylgja mér alla ævi og gera mig að hæfari einstaklingi til að bjarga mér við erfiðar aðstæður í lífinu og einnig opnast sá möguleiki að ég geti jafnvel nýtt mér þessa reynslu seinna meir við atvinnusköpun í fjallaferðamennsku.“