Fjórir göngumenn látnir og fjölda saknað í Nepal

Fjórir göngumenn hafa fundist látnir og fjölda er enn saknað eftir að mikið óveður gekk yfir Himalaya-fjallgarðinn í Nepal í gær.

Í frétt BBC kemur fram að tveir Pólverjar, Ísraeli og Nepali hafi farist í óveðrinu.

Nepalskir hermenn leita nú þeirra sem er saknað í kringum Thorung La skarðið og eru þyrlur meðal annars notaðar til verksins. Fjörutíu fjallgöngumönnum hefur þegar verið bjargað.

Mennirnir voru að ganga hinn svokallaða Annapurna-hring þegar óveðrið skall á.

Óveðrið stafaði af fellibylnum Hudhud sem skall á Indland fyrr í vikunni.