Stefnu vantar vegna mengunar af völdum ferðamanna

Stefnu vantar á sviði mengunar af völdum ferðamanna að sögn Viðars Jökuls Björnssonar, umhverfis- og auðlindafræðings.

„Það er alltaf litið til tveggja þátta, hversu miklu ferðamenn skila í þjóðarbúið og hve margir þeir eru en í mörgum tilfellum gleymast umhverfisþættirnir,“ segir Viðar Jökull sem nýlega lauk meistararitgerð í umhverfis- og auðlindafræði við Háskóla Íslands þar sem hann mat kolefnisspor ferðamanna á Íslandi árið 2011.

Fyrirtæki í ferðaþjónustu þyrftu einnig að gera meira í þessum efnum. „Ferðaþjónustan gerir út á að spila Ísland sem þetta hreina og tæra land. Þá þarf hún að standa við það,“ segir Viðar Jökull og bætir við: „Langflestir eru ekkert að spá í þessu. Það olli mér svolitlum vonbrigðum.“

Meðalferðamaðurinn eyðir 50,2 kílóum af koltvísýringi á dag. Það er heldur minna en sambærileg rannsókn sem gerð var á hollenskum ferðamönnum sem eyddu um að meðaltali 62 kílóum af koltvísýringi á dag.

Í heild áætlar Viðar Jökull að mengun af völdum ferðamanna sé á milli 0,5 og 2,8 prósenta af heildarútblæstri koltvísýrings á Íslandi. Sú tala mun þó fara hækkandi á næstu árum með auknum fjölda ferðamanna.