Ebólusmitaði Bandaríkjamaðurinn nafngreindur

Bandarískir fjölmiðlar hafa greint frá því að heilbrigðisstarfsmaðurinn sem smitaðist af ebólu við umönnun á Thomas Duncan áður en Duncan lést er 26 ára kona að nafni Nina Pham. Rannsókn stendur nú yfir á spítalanum í Dallas þar sem Pham smitaðist, en hún er fyrsta manneskjan sem smitast af ebólu í Bandaríkjunum.



BBC greinir frá. Tom Frieden, fulltrúi sóttvarnaembættis Bandaríkjanna, segir að einhvers konar brot á reglum hafi átt sér stað þegar Pham smitaðist af Duncan. Hann ítrekaði þó í dag að hann vill þó ekki ávíta Pham eða spítalann.

„Við þurfum að endurhugsa það hvernig við verjumst ebólusmiti,“ segir Frieden. „Meira að segja eitt tilfelli er óviðunandi.“

Pham er nú haldið á spítala og er ástand hennar sagt stöðugt. Heimili hennar hefur verið sótthreinsað og fylgst er með öllum þeim sem hún gæti hafa smitað ásamt hinum starfsmönnunum sem sáu um að hjúkra Duncan. Sá greindist með ebólu við komu til Bandaríkjanna frá Líberíu og lést í Dallas.