Sturridge besti enski framherji sem ég hef spilað með

Steven Gerrard, fyrirliði Liverpool, segir að samherji hans hjá Liverpool Daniel Sturridge sé besti enski framherji sem hann hefur spilað með í gegnum tíðina.

Gerrard sem hætti á dögunum að leika með enska landsliðinu hefur leikið með framherjum eins og Wayne Rooney og Michael Owen, en segir að Sturridge sé sá besti.

„Þegar það er talað um hæfileika í þessu landi, þá er Daniel Sturridge með mestu hæfileikana að mínu mati," sagði Gerrard við Daily Mail.

„Fyrir mér er hann besti enski framherji sem ég hef spilað með þegar þú berð saman hraða, snerpu, hæfileika og mismunandi týpur af mörkum."

„Við þurfum hann núna. Við þurfum hann úr meiðslunum eins fljótt og mögulegt er. Á síðasta ári var hann í skugganum á Suarez, en nú er hans tími til að vera framherji Liverpool til margra ára," sagði Gerrard að lokum.