Hafði glutrað niður öllum auðæfunum

Boris Beresovskí fannst látinn á baðherberginu í stórhýsi sínu í Ascot á sunnanverðu Englandi síðasta laugardag. Lögreglan skýrði frá því á mánudagskvöld að banamein hans hefði verið henging. Ekki vildi hún fullyrða hvort hann hefði svipt sig lífi, en engin merki fundust um átök.

Um aldamótin var hann einn auðugasti og jafnframt einn valdamesti maður Rússlands, einn af „olígörkunum“ svonefndu, fáveldiskóngunum sem röðuðu sér á jötuna hjá Boris Jeltsín forseta.

Við andlátið hafði hann glutrað niður auðæfunum, var orðinn þunglyndur og vildi helst snúa aftur heim til Rússlands. Þaðan flúði hann árið 2001 í sjálfskipaða útlegð til Bretlands, eftir að hafa fallið í ónáð hjá Vladimír Pútín forseta.

Hann hefur síðan óspart gagnrýnt Pútín Rússlandsforseta, meðal annars sakað hann um að hafa staðið að morðinu á Alexander Litvinenko, rússneska njósnaranum sem lést í London árið 2006 eftir að eitrað hafði verið fyrir honum með geislavirku efni.

Þeir Litvinenko urðu góðir vinir eftir að Litvinenko fullyrti opinberlega að yfirmenn sínir hjá rússnesku leyniþjónustunni hefðu falið sér það verkefni að myrða Beresovskí. Litvinenko hlýddi ekki, heldur tók sér stöðu með stjórnarandstæðingum og fór að skrifa bækur um ógnarstjórn Pútíns.

Beresovskí slapp nokkrum sinnum með skrekkinn þegar reynt var að ráða hann af dögum, bæði í Rússlandi og í Bretlandi. Árið 1994 var meðal annars gerð sprengjuárás á bifreið hans, sem kostaði bílstjóra hans lífið.

Á síðasta ári tapaði Beresovskí dómsmáli gegn Roman Abramovitsj, öðrum rússneskum auðkýfingi í Bretlandi, eiganda fótboltaliðsins Chelsea. Dómari sagði ekkert hæft í ásökunum Beresovskís um að Abramovitsj hefði kúgað út úr honum fé.