Sigurður Ragnar: Verður eitthvað alveg sérstakt

Í kvöld kom í ljós að íslenska kvennalandsliðið mætir því sænska í átta liða úrslitum á EM í Svíþjóð og spilar þar með við heimamenn fyrir framan troðfullan völl í Halmstad á sunnudaginn klukkan eitt að íslenskum tíma.

Sigurður Ragnar Eyjólfsson ræðir mótherja íslenska liðsins í viðtali á heimasíðu Knattspyrnusambands Íslands.

„Ég vildi mæta sænska liðinu. Svíar eru á heimavelli, gestgjafar í þessu móti, og stefna þeirra er klárlega á að vinna Evrópumeistaratitilinn á sænskri grundu.  Það verður fullur völlur, frábær stemmning og það er viðeigandi að það sé þannig, því þetta verður líklega einn allra stærsti knattspyrnuleikur sem íslenskt landslið hefur tekið þátt í.  Við erum tilbúnar í verkefnið og munum gera okkar allra besta," sagði Sigurður Ragnar.

„Það verður að hafa í huga að þegar komið er í 8-liða úrslit á stórmóti eru allir mótherjarnir öflugir, en að mæta gestgjöfunum á þeirra heimavelli, það verður eitthvað alveg sérstakt og við hlökkum til leiksins. Margir af okkar leikmönnum eru að spila í Svíþjóð eða hafa spilað sem atvinnumenn í Svíþjóð svo það gerir leikinn sérstaklega spennandi fyrir okkur," sagði Sigurður Ragnar en hverjir eru möguleikar íslenska liðsins?

„Við höfum auðvitað spilað við Svíþjóð í tvígang á þessu ári, töpuðum 6-1 í Algarve-bikarnum og svo 2-0 í Växjö í apríl.  Við höfum bara einu sinni unnið Svíþjóð svo við verðum litla liðið í þessari viðureign.  En það sem er svo heillandi við fótbolta er að það er alltaf möguleiki á sigri.  Það getur allt gerst þegar komið verður í 8-liða úrslitin, þó að fyrirfram séu Svíarnir mun sigurstranglegri.  Okkar vopn verða leikskipulag, barátta, vilji og íslenskur dugnaður.  Ef við gefum allt sem við eigum í leikinn og leikum agaðan leik eigum við möguleika á móti öllum þjóðum," sagði Sigurður Ragnar á heimasíðu KSÍ.