Platini vill taka upp skammarkrók í fótboltanum

Michel Platini, forseti UEFA, er óhræddur að koma fram með nýjar hugmyndir varðandi framtíð fótboltans og nú vill Frakkinn breyta gulu spjöldunum. Platini vill frekar taka upp skammarkrók í fótboltanum.

„Ég vil gera þetta eins og í rúgbý þar sem sá brotlegi þarf að yfirgefa völlinn í tíu til fimmtán mínútur í stað þess að fá gult spjald," sagði Michel Platini í viðtali við spænska blaðið AS.

„Þetta er bara hugmynd sem þarf nú að fá tækifæri til að þroskast og þróast áður en við vitum hvort að þetta væri góð breyting fyrir fótboltann. Þetta er samt tillaga sem vert er að skoða betur," sagði Platini.

Helstu rök Platini fyrir þessari breytingu er að með þessu væri refsingin sanngjarnari vegna þess að hún nýttist þeim sem var brotið á í stað þess nýtast þriðja aðila sem er þá liðið býður í næsta leik á eftir.  

Platini vill líka breyta því að markverðir fái rautt spjald þegar þeir fá á sig vítaspyrnu.

„Það er alltof mikil refsing. Það er nóg refsing að fá dæmt á sig víti. Ég held að bæði UEFA og FIFA séu sammála um það en tvö lönd sem eiga sæti í nefndinni vilja ekki breyta þessu," sagði Platini í þessu viðtali við spænska blaðið.

The International Football Association Board tekur allar ákvarðanir um breytingar á knattspyrnulögunum. Í henni er fulltrúi frá FIFA sem og fulltrúar frá fjórum knattspyrnusamböndum Bretlands, það er Englandi, Skotlandi, Wales og Norður-Írlandi.