Frakkar deila um foreldrahlutverkið

Þegar François Hollande gaf frönskum kjósendum það loforð að lögleiða hjónabönd samkynhneigðra vakti það engin hörð viðbrögð í Frakklandi. Eftir að hann var kosinn forseti og kom þessu kosningaloforði sínu til afgreiðslu á þingi kom hins vegar annað hljóð í strokkinn.

Fjölmennar mótmælagöngur hafa verið haldnar á síðustu vikum, sumar með þeim fjölmennustu sem þekkst hafa í Frakklandi síðustu áratugina. Frakkar hafa reynst íhaldssamari en þeir sjálfir reiknuðu með.

Harðasta andstaðan hefur þó ekki beinst að hjónaböndum samkynhneigðra sem slíkum, heldur að hugmyndum um að samkynhneigð hjón geti ættleitt börn, fengið leyfi til að gangast undir frjósemisaðgerðir eða notað staðgöngumæður til að eignast börn.

Harðar deilur hafa vaknað um það hvort samfélagið og vísindin séu farin að ætla sér of stórt hlutverk við að skipuleggja barneignir og þjóðfélagið hefur nánast logað í umræðum um það hvort innan skamms verði farið að bjóða líkama kvenna til leigu.

Vegna andstöðunnar féllu Hollande og Sósíalistaflokkur hans reyndar nú í janúar frá öllum áformum um að tengja lögleiðingu hjónabands samkynhneigðra við áform um að auðvelda aðgang að frjósemisaðgerðum.

Upp úr sauð hins vegar á þingi í þessari viku, þegar frumvarp stjórnarinnar kom þar til umræðu, því þá kom í ljós að Christiane Taubira dómsmálaráðherra hafði nánast í kyrrþey gefið út heimild til þess að börn, sem staðgöngumæður hafa fætt erlendis, geti fengið franskt fæðingarvottorð.

„Þú ert að ýta undir aðfarir sem eru ólöglegar hér í landi, aðfarir sem eru árásir á mannlega reisn," sagði Jean-François Cope, leiðtogi stjórnarandstöðunnar, á þingfundi á miðvikudag: „Börn verða hlutir sem hægt er að kaupa og selja."

Dómsmálaráðherrann hefur hins vegar ítrekað fyrri yfirlýsingar um að ekki standi til að lögleiða staðgöngumæðrun.

Olivier Dussopt, einn þingmanna Sósíalistaflokksins, segist reyndar telja að Frökkum muni smám saman snúast hugur og fallast á áform stjórnarinnar, rétt eins og gerðist eftir að þingið ákvað að lögleiða fóstureyðingar árið 1975.