Ísraelsmenn íhuga frekari loftárásir á Sýrland

Ráðamenn í Ísrael vara við því að loftárás flughers þeirra á skotmark í Sýrlandi í vikunni sé aðeins upphafið að því sem koma skal.

Ísraelsmenn hafa miklar áhyggjur af því að Sýrland er að liðast í sundur og það geti þýtt að eitthvað af viðamiklum vopnabúrum þar í landi endi í höndum samtaka eins og Hizbollah hreyfingarinnar í Líbanon.

Skotmarkið sem Ísraelsmenn gerðu árás á virðist hafa verið bílalest á leið yfir landamærin frá Sýrlandi til Líbanon.

Einn af leiðtogum Likud flokksins í Ísrael segir að ef heldur sem horfir neyðist Ísraelsmenn til að grípa til eigin ráðstafana til að tryggja öryggi ríkisins.