Sprenging í flugeldum kostaði nær 30 manns lífið í Kína

Nærri 30 manns fórust og hluti af hraðbraut í miðhluta Kína hrundi þegar flutningabíll hlaðinn flugeldum sprakk í loft upp á brautinni í gærkvöldi.

Í fréttum kínverska fjölmiðla kemur fram að sprengingin eyðilagði um 80 metra langan kafla af hraðbrautinni sem liggur um Henen hérað. Björgunarsveitir vinna nú að því að leita að fleirum í rústunum eftir sprenginguna en óttast er að tala látinna eigi eftir að hækka.

Mikið er um flutninga á flugeldum á vegum Kína þessa dagana þar sem kínverska nýárið er framundan í næstu viku. Því er ætíð fagnað með miklum flugeldasýningum.