Allt að 150 er enn þá saknað

Búið er að finna tæplega tvö hundruð lík afrískra flóttamanna sem fórust með skipi nærri ströndum eyjunnar Lampedúsa fyrr í vikunni. Kafarar endurheimtu 83 lík úr flaki skipsins í gær en talið er að allt að 500 manns hafi verið um borð.

Því er talið að að minnsta kosti 194 hafi farist þegar skipið sökk og um það bil 150 er enn þá saknað. Að sögn flóttamannahjálpar Sameinuðu þjóðanna voru flestir flóttamannanna frá Erítreu.

Skipið valt á hliðina síðasta fimmtudag þegar óðagot kom á flóttamenn um borð. 155 flóttamönnum hefur verið bjargað en þeir biðu eftir hjálp í sjónum í þrjá tíma og voru sumir þeirra mjög máttfarnir þegar þeim var bjargað.

Þjóðarsorg hefur verið lýst yfir á Ítalíu, auk þess sem Ítalir og Frakkar krefjast þess að málið verði rætt á ráðherrafundi Evrópusambandsins sem fram fer á morgun.