Kínverskir hakkarar ítrekað ráðist á New York Times

Bandaríska stórblaðið New York Times greinir frá því í kvöld að það hafi ítrekað orðið fyrir tölvuárásum síðan í haust. Forsvarsmenn blaðsins eru þess fullvissir að kínversk yfirvöld séu á bak við árásina. Utanríkisráðuneyti Kína hafnar reyndar ásökunum staðfastlega og talsmaður ráðuneytisins segir Kína einnig fórnarlamb tölvuglæpa.

Í yfirferð BBC um málið kemur fram að árásirnar á New York Times hafi byrjað í september þegar blaðið var að vinna að frétt um gríðarleg auðævi nýkjörins forsætisráðherra landsins, Wen Jiabao. Þá þegar uppgötvaðist árásin sem fól í sé víðtæka árás á allar tölvur blaðsins þar sem hakkararnir reyndu að komast yfir öll möguleg gögn sem hægt var komast í.

Blaðið réði tölvuöryggisfyrirtæki sem rannsakaði hegðunarmynstur hakkarana í fjóra mánuði. Öryggisfulltrúi fyrirtækisins segir það augljóst, sé litið til einstakra árása, að það beri öll merki tölvuárása á vegum kínverska ríkisins.

Meðal vísbendinga sem fyrirtækið byggir þetta mat sitt á er að tölvuárásirnar byrja stundvísislega klukkan átta um morgun á kínverskum tíma í Peking.

Öryggisfulltrúinn segir árásina beinast að miklu leyti að blaðamanninum David Barboza, sem er staðsettur í Sjanghæ, en hann skrifaði upprunalegu fréttina um auðsöfnun forsætisráðherrans. Öryggisfulltrúinn segir einnig að hakkarnir hefðu getað stórskaðað tölvukerfi blaðsins, en það gerðu þeir ekki, heldur virtust þeir leita að hverjum þeim sem gæti hafa lekið upplýsingum í blaðmanninn.