Fimmtugur Breti græðir milljónir á hvalagubbi

Hinn fimmtugi Ken Wilman frá bænum Morecambe á Englandi datt heldur betur í lukkupottinn þegar hundurinn hans fann lítilræði af hvalagubbi í fjörunni.

„Mér sýndist þetta vera fótbolti, en svo þegar ég kom nær sá ég að þetta var stór steinn," sagði Wilman í viðtali hjá Sky News um fundinn, en megnan óþef lagði frá steininum og á honum voru ljósgular slettur.

Sletturnar reyndust vera af hvalavöldum, og fljótlega varð Wilman það ljóst að um mikil verðmæti væri að ræða. Ilmvatnsframleiðendur borga dýrum dómum fyrir hvalagubb, vegna þess að í því má finna afar fágætt efni sem notað er til ilmvatnsgerðar.

Franskt fyrirtæki hefur boðið Wilman 50.000 evrur fyrir gubbið, en það jafngildir um 8.6 milljónum króna. Þá eru svissneskir ilmvatnsframleiðendur sagðir hafa boðist til að fjórfalda þá upphæð.

Wilman, sem er atvinnulaus einstæður faðir, ætlar að nota aurinn í ferðalag til Perú ásamt syni sínum. Einnig hyggst hann gleðja hinn fundvísa hund daglega með uppáhalds pylsunum sínum.