Á Suðurskautinu á aðfangadag

„Ég þurfti að taka fimm flug til að komast á Suðurskautið. Þegar ég lenti í Punta Arenas í Síle eftir þrjátíu tíma ferðalag var farangurinn minn og búnaður á einhverju allt öðru ferðalagi. En hann skilaði sér og ég er búin að vera í undirbúningi síðustu tvo daga fyrir gönguna,“ segir leik- og söngkonan Halla Vilhjálmsdóttir. Hún heldur til Suðurskautsins í dag til að ganga á Vinson Massif, hæsta tindinn á Suðurskautinu.

„Þetta verður þriðji tindurinn af tindunum sjö, þeim hæstu í hverri heimsálfu, sem ég geng á á einu ári. Ég er bæði búin að ná toppnum á Aconcagua og Kilimanjaro,“ segir Halla. Pólfarinn Vilborg Arna Gissuradóttir er líka á Suðurskautinu en óvíst hvort stöllurnar tvær hittist.

„Ég las í fréttum að önnur íslensk stelpa yrði á sama tíma og ég á Suðurskautinu. Þvílík tilviljun,“ segir Halla. Hún hefur gert ýmislegt til að undirbúa sig fyrir þrekraunirnar á árinu.

„Undirbúningurinn fer eftir hinum mismunandi kröfum sem hver tindur gerir. Ég hef farið og æft og gist í Snowdonia í Wales til að prófa búnað, hef farið í klettaklifur innandyra, jöklaþjálfun í Ölpunum og jóga. Það getur verið að ég klári tindana fyrst ég er nánast hálfnuð en ég tek hverju verkefni fyrir sig sem eitt skref í einu og reyni að njóta hvers þrekraunaævintýris fyrir sig,“ segir Halla sem er búsett í London. Hún er hrifin af hvers kyns jaðaríþróttum og vekur mikla athygli í London.

„Ég er komin með fullt mótorhjólapróf og keyri stór hjól um alla London til og frá vinnu, sem gengur svakavel. Fólk heldur reyndar yfirleitt að hjálmurinn sé últranýtískulegt veski þegar ég geng inn því ég lít ekki beint út eins og hinn hefðbundni „biker“,“ segir Halla glöð í bragði, tilbúin fyrir Suðurskautið. En hvernig verða jólin hjá þessari duglegu leik- og söngkonu?

„Hvað segirðu, eru jól? Ja, ekki hjá mér. Ég verð í gaddfreðnu tjaldi uppi á fjalli á Suðurskautinu að gera hana móður mína brjálaða á aðfangadag og jóladag. Ekki er það nú jólalegt.“