400 utankjörfundaratkvæðum verður eytt

Yfir 400 utankjörfundaratkvæðum í nýafstöðnum þingkosningum í Noregi verður eytt af því að þau bárust of seint með póstinum. Í frétt á vef norska ríkisútvarpsins er haft eftir Frank Aarebrot, prófessor við Háskólann í Bergen, að þetta sé hneyksli. Vonandi viti þeir sem nýttu sér kosningarétt sinn ekki af því að þeir hafi misst hann.

Samkvæmt upplýsingum frá þeim sveitarfélögum sem norska ríkisútvarpið hefur hingað til haft samband við var póstdreifingin á eftir áætlun. Upplýsingastjóri Póstsins telur að í sumum tilfellum geti það verið rétt en í öðrum hafi sveitarfélögin, sem koma áttu atkvæðum á réttan stað, sent þau of seint.