Elskar að taka myndir og kaupa föt

„Ég byrjaði að blogga í fyrra. Mig sárvantaði stað til þess að tjá mig á og fá útrás fyrir sköpunargleðina,“ segir lífsstílsbloggarinn og móðirin Guðrún Veiga Guðmundsdóttir, sem heldur úti vinsælli bloggsíðu sem heitir einfaldlega Guðrún Veiga.

Guðrún býr á Reyðarfirði með sambýlismanni sínum og sex ára syni þeirra. Hún er heima flesta daga að skrifa mastersritgerð í mannfræði við Háskóla Íslands.

„Mig var farið að sárvanta stað til þess tjá mig og það brýtur upp daginn að getað bloggað á milli þess að rembast við ritgerðina,“ segir hún.

Bloggið hennar er fjölbreytt og þar má finna allt milli himins og jarðar, allt frá uppskriftum að góðum viskísleikjóum yfir í nýjustu fatakaup Guðrúnar. „Mér finnst svakalega gaman að dunda mér í eldhúsinu og ég er dugleg að birta myndir úr mataruppskriftum á blogginu mínu.

Svo er ég algjör ebay-fíkill og það er gaman að geta deilt kaupunum mínum með öðrum.“ Aðspurð segir hún að meiri pressa sé á að blogga eftir að lesendum fór fjölgandi. „Ég verð oft pirruð ef ég sleppi úr degi, það er viss pressa á mér að bjóða lesendum mínum upp á nýtt efni reglulega. Sem betur fer finnst mér ótrúlega skemmtilegt að blogga, annars væri ég ekki að þessu. Kærastinn minn hefur að vísu núna stað til þess að fylgjast með öllu því sem ég kaupi, hann les færslurnar mínar reglulega. Það er kannski helsti ókosturinn við bloggið,“ segir Guðrún og skellihlær.

Á síðunni er mikið lagt upp úr myndum en Guðrún tekur allar myndirnar sjálf. „Kærastinn minn gaf mér rándýra myndavél í fyrra og ég var alveg brjáluð út í hann yfir að að eyða svona miklum peningum. Ég verð að viðurkenna að þetta voru ein bestu kaup sem hann hefur gert. Ég fer ekkert án þess að hafa myndavélina með mér,“ segir Guðrún Veiga að lokum.