Smókpásur útlægar í Árósum

Starfsfólk Árósaborgar munu um næstu mánaðamót þurfa að sætta sig við að mega ekki reykja á vinnutíma. Árósar eru fyrsta sveitarfélagið í Danmörku sem stígur þetta skref til fulls.

Bannið tekur til hinna 25.000 starfsmanna borgarinnar og er nokkuð umdeilt enda víðtækt og gildir jafnvel um fólk í heimahjúkrun sem má ekki reykja á ferðum sínum milli skjólstæðinga, þó svo það noti eigin bifreið.

Thomas Medon, formaður heilbrigðis- og umönnunarsviðs hjá borginni, segir í samtali við DR að markmiðið með reglunum sé að tryggja starfsfólki heilbrigðara starfsumhverfi. „Það að starfsfólkið fari ekki út í reykingahlé eykur gæði starfs í skólum, leikskólum og á vistheimilum,"segir hann. Þó reglurnar virðist strangar muni þær komast upp í vana og verða eins eðlilegar og reykingabann á veitingastöðum.

Formaður félags bæjarstarfsmanna á Austur-Jótlandi segir áríðandi að draga úr óbeinum reykingum en þessar reglur gangi of langt.