Flestir geta fengið vegabréf

Reglum sem gilt hafa um utanlandsferðir Kúbverja hefur nú verið breytt og geta nú flestir þeirra fengið vegabréf. Áður þurftu Kúbverjar sérstakt leyfi til utanlandsferðar auk þess sem þeir þurftu að sýna fram á að þeim hefði verið boðið til annars lands.

Á vef danska ríkisútvarpsins er haft eftir einum þeirra sem sótt hafa um vegabréf, Jose Luis Guerra, að nú geti Kúbverjar farið hvert út í heim sem þeir vilja. Málið snúist hins vegar um hvort önnur lönd vilji fá þá í heimsókn. Flest lönd krefjist nefnilega vegabréfsáritunar af Kúbverjum.

Jafnframt er tekið fram að yfirvöld á Kúbu geti neitað að afhenda einstaklingum í vissum starfsstéttum, sem taldar eru mikilvægar fyrir ríkið, vegabréf. Gagnrýnendur segja þess vegna að málið hafi einungis verið leyst til hálfs með nýju reglunum. Haft er eftir Oscar Elias Biscet, kúbverskum mannréttindafrömuði, að stjórnvöld hafi ekki veitt kúbversku þjóðinni fullt frelsi.

Fæstir búast við að Kúbverjar streymi nú til annarra landa, þar sem meðalmaðurinn þéni ekki nóg til þess að geta greitt fyrir utanlandsferð.- ibs