Misnotaði hundruð manna á hálfri öld

Breski skemmtikrafturinn Jimmy Savile er talinn hafa misnotað að minnsta kosti 214 manns á árunum 1995 til 2009. Breska lögreglan telur fullvíst að fjöldi þolenda hans sé mun meiri, því brotaferill hans stóð yfir í meira en hálfa öld.

Savile lést árið 2011, þá 84 ára gamall, og fór útför hans fram með viðhöfn enda var hann þekktur í bresku samfélagi, bæði sem skemmtikraftur í útvarpi og sjónvarpi og sem ötull baráttumaður góðgerðarsamtaka.

Í skýrslu, sem birt var í gær og var unnin í sameiningu af bresku lögreglunni og breskum barnaverndarsamtökum, kemur fram að nærri 500 manns hafi haft samband við lögreglu með upplýsingar um kynferðisbrot Saviles.

Meðal kynferðisbrota hans eru 34 nauðganir, en fórnarlömb hans voru á aldrinum átta til 47 ára. 73 prósent þolenda brotanna voru yngri en 18 ára, en 82 prósent voru kvenkyns.

Mörg brotanna voru framin á vinnustað hans hjá breska útvarpinu BBC en fimmtíu kynferðisbrot framdi hann á sjúkrahúsum og fjórtán í skólum.

„Nú er ljóst að Savile var í felum fyrir allra augum og notaði frægðarstöðu sína og fjáröflunarstörf til þess að fá óheftan aðgang að varnarlausum einstaklingum yfir sex áratuga tímabil,“ segir í skýrslunni.

„Hann valdi aðeins þá sem varnarlausastir voru,“ segir David Gray frá bresku lögreglunni, annar höfunda skýrslunnar: „Hann var nógu klár til að sjá hverjir væru ólíklegastir til að segja eitthvað gegn honum.“

„Allt þetta subbulega mál hefur leitt í ljós hve hryggilegar afleiðingar það hefur þegar varnarleysi mætir valdmennsku,“ segir Peter Spindler, yfirmaður sérfræðideildar lögreglunnar.

Ríkissaksóknari Bretlands sendi í gær frá sér yfirlýsingu þar sem beðist er afsökunar á því að kynferðisbrot Saviles hafi ekki verið rannsökuð nægilega vel fyrr en nú, þótt embættinu hafi borist ábendingar og ásakanir á árunum 2007 og 2008.