Páfi kveðst hætta vegna hrumleika

Páfagarður, AP Tíðindin af afsögn Benedikts XVI. páfa komu kaþólsku kirkjunni í opna skjöldu. Flestir nánustu samstarfsmenn hans höfðu ekki gert sér grein fyrir því sem til stóð.

„Allir kardínálarnir voru sem þrumu lostnir og litu hver á annan,“ segir Oscar Sanchez, kardínáli frá Mexíkó, sem var viðstaddur þegar Benedikt las upp tilkynningu um afsögn sína. Sumir áttu greinilega erfitt með að skilja tíðindin.

Bróðir hans, Georg Ratzinger, segir að páfi hafi verið að velta þessu alvarlega fyrir sér undanfarna mánuði.

„Ég hef fullvissað mig um það að vegna aldurs hafi ég ekki lengur nægan styrk til að sinna páfadómi svo fullnægjandi sé,“ sagði Benedikt í yfirlýsingunni, sem hann las upp á fundi með kardínálum í Páfagarði.

Hann sagði þær kröfur sem nútíminn gerði til starfsins vera það miklar að til að standa undir þeim þurfi menn að vera bæði líkamlega og andlega vel á sig komnir.

Þegar Benedikt var kosinn páfi árið 2005 var hann guðfræðingur og kardínáli í Þýskalandi og hét enn Joseph Ratzinger. Hann var orðinn 78 ára og var farinn að hlakka til þess að setjast í helgan stein. Hann hefur sagt að hann hefði heldur kosið að njóta ævikvöldsins við bóklestur og gönguferðir, frekar en að vera í kastljósi fjölmiðlanna og bera höfuðábyrgð á kaþólsku kirkjunni.

Páfatíð Benedikts hefur að nokkru verið stormasöm. Nokkru áður en hann tók við voru kynferðisbrot fjölda kaþólskra presta víða í Bandaríkjunum og Evrópulöndum að komast í hámæli, en það kom í hans hlut að takast á við þessi hneykslismál sem æðsti yfirmaður kirkjunnar.

Hann tók sjálfur á móti fjölmörgum fórnarlömbum kynferðisbrotanna og hét því að kaþólska kirkjan myndi standa sig framvegis. Yfirhylmingar með kynferðisbrotum yrðu liðin tíð.

gudsteinn@frettabladid.is