Bikiníklædd prinsessan birtist í ítölsku slúðurtímariti

Ítalska slúðurtímaritið Chi hyggst birta ljósmyndir sem teknar voru af Kate Middleton, hertogaynjunni af Cambridge, bikiníklæddri á sólarströnd í Karabíska hafinu.

Myndirnar voru teknar þar sem prinsessan gekk meðfram strönd eyjunnar Mustique ásamt eiginmanni sínum, Vilhjálmi prins, en prinsessan gengur með barn þeirra undir belti.

Talsmaður konungsfjölskyldunnar segir birtinguna vera klárt brot á friðhelgi einkalífs þeirra hjóna, en gefur ekki upp hvort þau muni leita réttar síns.

Í fyrra birti sama tímarit 26 síðna myndaseríu af brjóstaberri prinsessunni í sumarfríi í Frakklandi.