40 slösuðust í átökum í Mexíkó

Lögreglan í Mexíkó lenti í átökum við mótmælendur og kennara á Zocalo-torgi í gær en þeir hlýddu ekki fyrirskipunum um að hætta mótmælum áður en formleg hátíðarhöld hófust í tilefni þjóðhátíðardags landsins.

Þúsundir kennara höfðu hafst við á torginu síðustu þrjár vikur en flestir mótmælendana höfðu hlýtt tilskipunum yfirvalda um að láta af mótmælum áður en frestur sem þeim var gefinn til að hverfa þaðan rann út.

Fresturinn rann út síðdegis í gær og voru nokkur hundruð mótmælendur enn á svæðinu þegar lögreglan kom á vettvang. Um 40 manns slösuðust í átökunum, en lögreglan beitti táragasi og háþrýstidælum gegn mótmælendunum.