Rukkað fyrir áhorf á Youtube?

Google, eigandi myndbandavefsins Youtube, veltir fyrir sér að leyfa framleiðendum myndbanda að rukka fyrir áhorf á vefsíðunni. Hugmyndin gæti orðið að veruleika síðar á þessu ári samkvæmt heimildarmönnum Wall Street Journal.

Með breytingunni yrði til ný tekjulind fyrir vefinn og þá fjölmörgu sem birta myndbönd sín á honum. Talið er að breytingin gæti orðið framleiðendum myndbanda aukin hvatning til þess að birta efni sitt á vefnum. Áskriftargjald gæti komið betur til móts við myndbandaframleiðendur sem hingað til hafa mátt reiða sig alfarið á auglýsingatekjur á Youtube.

Forsvarsmenn Youtube hafa viðrað hugmyndina áður og er hún því ekki úr lausu lofti gripin.

„Við höfum lengi haldið því fram að ólíkt efni þurfi á ólíkum greiðsluformum að halda," segir ónafngreindur heimildarmaður Wall Street Journal sem þekkir vel til hjá Youtube.

„Fjölmargir þeirra sem setja efni inn á vefinn telja að þeir myndu hagnast frekar á áskriftarkerfi svo það er til skoðunar."

Wall Street Journal tilekur tvö mögulega dæmi. Myndbandaframleiðandi myndi stofna rás á Youtube og rukka notendur áskriftargjald fyrir aðgang að rásinni. Önnur leið væri sú að framleiðendur gætu rukkað áhorfendur fyrir að fá að sjá myndbandið nokkrum dögum áður en allir hefðu aðgang að því. Sú aðferð hefur verið reynd áður en því fylgdi vandamál því sumir áhorfendur „stálu" myndbandinu úr forsýningu og birtu á öðrum vefsíðum.

Nánar um málið á vef Wall Street Journal.