Rappstjarnan Rick Ross slapp lifandi frá skotárás

Skotárás var gerð á rapparann Rick Ross þegar hann ók Rolls Royce bíl sínum um götur Forth Lauderdale í Flórída í fyrrakvöld. Ross náði að flýja undan árásinni en ók þá bílnum á nærliggjandi húsvegg.

Rick Ross er ein stærsta rappstjarna Bandaríkjanna, allavega í bókstaflegri merkingu því hann er hátt í 200 kíló að þyngd. Í frétt um málið á vefsíðu CNN segir að Ross hafi verið akandi ásamt kærustu sinni þegar bíl var rennt upp að hlið þeirra og skothríðin hófst. Vitni segja að fleiri tugir af kúlum hafi skollið á bílnum.

Þegar lögreglan kom á staðinn voru Ross og kærastan horfin af vettvangi og munu ekki hafa slasast. Ross hefur fengið hótanir frá glæpagenginu Gangster Disciples. Þeir saka hann um að hafa borið Davíðsstjörnu um hálsinn á tónleikum en stjarnan er einkennismerki gengisins. Kröfðust þeir greiðslu eða sektar af hálfu Ross sem sagði þeim að éta það sem úti frýs, með ekki svo kurteisum orðum.

Ross á einnig í málaferlum við fyrrverandi fíkniefnakónginn Ricky „Freeway" Ross í Los Angeles. Ricky hefur ákært Ross fyrir að hafa stolið bæði nafni sínu og orðspori.

Þessir erfiðleikar hafa lítil áhrif á listsköpun Ross. Hann er útnefndur til Grammy verðlauna fyrir bestu rappplötuna á síðasta ári en hún ber nafnið "Guð fyrirgefur, en ekki ég".