Sex ára gömlum strák haldið í gíslingu

Maður vopnaður byssu fór um borð í skólabíl í Alabama-fylki síðdegis í gær, tók sex ára gamlan dreng í gíslingu og drap bílstjórann sem reyndi að bjarga stráknum.

Bandaríski fréttamiðlinn CNN greinir frá þessum atburði sem átti sér stað síðdegis á þriðjudag. Drengurinn er enn í haldi mannsins í neðanjarðarbyrgi við heimili sitt í borginni Midland City í Alabama fylki. Bílstjórinn sem lét lífið var 66 ára gamall.

Lögreglan hefur verið í samskiptum við manninn í gegnum PVC pípu í nótt. „Við munum halda áfram að vinna að því í nótt að loka málinu eins fljótt og auðið er," sagði í yfirlýsingu frá fógetanum í Dale-sýslu.

Eftir að búið var að finna út hverra manna drengurinn var sem kom í ljós að hann þyrfti á daglegri lyfjagjöf að halda. Lögreglan kom lyfjum til drengsins í gegnum PVC pípuna í nótt og fékk um leið staðfest að í lagi væri með hann.

Atvikið átti sér stað að loknum skóladegi vestanhafs í gær. Michael Senn, prestur á svæðinu, ræddi við nokkra krakkanna sem voru um borð í skólabílnum.

„Hann sagði flestum þeirra að fara út úr bílnum," hafði Senn eftir börnunum. „Svo greip hann litla strákinn og skaut bílstjórann fjórum sinnum."

Nafn skotmannsins hefur ekki verið gefið upp. Alríkislögreglan vestanhafs hefur tekið yfir rannsókn málsins.

Fréttina á vef CNN má sjá hér.