Hanna Birna gefur kost á sér í embætti varaformanns

Hanna Birna Kristjánsdóttir hefur ákveðið að gefa kost á sér í embætti varaformanns Sjálfstæðisflokksins á komandi landsfundi flokksins.

„Með framboði mínu vil ég styrkja þá öflugu forystusveit sem Sjálfstæðisflokkurinn býr að um land allt, fá tækifæri til að vinna frekar að þeim breytingum sem þurfa að verða í stjórnmálum og leggja góðum verkum lið - í þágu hugsjóna Sjálfstæðisflokksins og hag alls almennings á Íslandi," segir í yfirlýsingu frá Hönnu Birnu.

Þá segir hún að það skipti miklu máli að flokkurinn nái góðum árangri í komandi kosningum.

„Aðeins með því að koma núverandi ríkisstjórn frá getum við vænst þess að skattar og skuldir lækki, atvinna aukist og Ísland verði land tækifæra, lífsgæða og farsælla lausna," skrifar Hanna Birna.

„Ég vil leggja mitt af mörkum til að slík framtíð bíði Íslendinga og mun því óska eftir stuðningi á landsfundi til að taka að mér frekara forystuhlutverk fyrir Sjálfstæðisflokkinn."