Frítt í sund, á söfn og í strætó á Vetrarhátíð

Vetrarhátíð í Reykjavík var sett á Austurvelli í gær, en yfirskrift hátíðarinnar er „Magnað myrkur". Borgarstjóri Reykjavíkur, Jón Gnarr, setti hátíðina.

Safnanótt, sem er hluti af Vetrarhátíð, hefst svo í kvöld klukkan 19:00 og er frítt inn á öll helstu söfn borgarinnar. Sérstakur Safnanæturstrætó mun flytja hátíðargesti frítt á milli borgarhluta og sveitarfélaga en dagskrá kvöldsins er þéttskipuð.

Má þar nefna stjörnuskoðun í Sjóminjasafninu, rökkurleiðsögn á Árbæjarsafni, leikbrúðuóperu í Gerðarsafni, þjóðlagapoppbræðing í húsi skáldsins að Gljúfrasteini og morðgátu í Þjóðminjasafninu.

Annað kvöld hefst svo Sundlauganótt, en á henni er heljarinnar dagskrá á fjórum sundstöðum í borginni, og frítt í sund frá 18-24.

Nánari upplýsingar og ítarlegri dagskrá má finna á vefsíðu Vetrarhátíðar.