Raðmorðinginn gengur enn laus

Bandaríski raðmorðinginn Christopher Dorner gengur enn laus. Lögregluyfirvöld í Los Angeles hafa skipulagt afar umfangsmikla leit að Dorner. Grunur leikur á að hann haldi til í fjallakofa í grennd við fjölsóttan dvalarstað, hátt yfir Los Angeles-borg.

Dorner, sem er lögreglumaður, er sakaður um að hafa myrt tvo samstarfsmenn sína um síðastliðna helgi.

Lögreglan í Los Angeles hefur notast við leitarhunda og þyrlur í leit sinni. Síðustu klukkutíma hefur leitin einskorðast við Big Bear Lake sem er í um 130 kílómetra fjarlægð frá borgarmörkum Los Angeles.

Ljóst er að Dorner, sem er 33 ára gamall, átti við geðræn vandamál að stríða. Hann birti átta blaðsíðna stefnuyfirlýsingu á vefsvæði sínu fyrr í vikunni þar sem hann hafði í hótunum við einstaklinga sem hann taldi að hefðu brotið gegn sér. Hægt er að nálgast yfirlýsinguna hér.