Berlusconi lofar Ítölum gulli og grænum skógum

Silvio Berlusconi er byrjaður að lofa Ítölum gulli og grænum skógum ef þeir bara kjósa hann að nýju til valda í landinu.

Þingkosningar eru framundan á Ítalíu seinna í þessum mánuði. Berlusconi gefur kost á sér þrátt fyrir að hafa hrökklast með skömm úr embætti forsætisráðherra landsins fyrir hálfu öðru ári síðan. Hann skildi efnahag Ítalíu eftir í rjúkandi rústum. Talið er að framboð hans nú sé eingöngu gert í þeim tilgangi að fá þinghelgi svo hann komist hjá að afplána dóm fyrir kynmök við stúlku undir lögaldri. Dómsins er að vænta eftir kosningarnar.

Nýjasta loforð Berlusconi er að afnema fasteignaskatt sem Mario Monti núverandi forsætisráðherra kom á til að reyna að rétta efnahag Ítalíu af og minnka gífurlegan halla á fjárlögum landsins. Til að mæta tekjutapinu ætlar Berlusconi að draga úr útgjöldum til stjórnmálaflokka, hækka skatta á tóbak og lottómiða og skattleggja tekjur Ítala af fjármálastarfsemi þeirra í Sviss.

Mario Monti lætur þetta lýðskrum Berlusconi sér í léttu rúmi liggja. Monti segir að Berlusconi hafi aldrei náð að efna eitt einasta kosningaloforð á öllum pólitískum ferli sínum. Monti á von á að ítalskir kjósendur muni hvernig ferill Berlusconi var og hvernig hann endaði undir lok ársins 2011.