Scotland Yard notaði nöfn látinna barna í fölsk skilríki

Breska lögreglan Scotland Yard stundaði það áratugum saman að nota nöfn látinna barna í Bretlandi til að búa til fölsk skilríki fyrir þá lögreglumenn sem þurftu að villa á sér heimildir í leynilegum verkefnum fyrir Scotland Yard.

Það er breska blaðið The Guardian sem segir frá þessu. Nöfn hinna látnu barna voru m.a. notuð til að búa til fölsk ökuskírteini og vegabréf fyrir lögreglumennina. Foreldrar þessara barna voru aldrei látnir vita af þessum gjörðum Scotland Yard.

Guardian segir að þetta hafi staðið yfir á árunum milli 1968 og 1994 og að um 80 lögreglumenn hafi fengið fölsk skilríki með nöfnum látinna barna. Í einstaka tilvikum hafi viðkomandi lögreglumaður notað hin fölsku skilríki í allt að áratug.

Fram kemur í breskum fjölmiðlum að rannsókn sé hafin á þessum gjörðum Scotland Yard.