Morðinginn enn ófundinn

Lögregluyfirvöld í Los Angels leita enn að Christopher Dorner, fyrrverandi lögreglumanni í borginni, sem grunaður er um þrjú morð.

Dorner hefur lýst yfir stríði gegn lögreglunni og segist ætla að myrða lögreglumenn og ástvini þeirra. Hann er nú þegar grunaður um að hafa myrt einn lögreglumann, dóttur fyrrverandi lögreglustjóra og kærasta hennar.

Dorner, sem er blökkumaður, segist hafa verið rekinn úr starfi árið 2007 vegna hörundslitar síns. Charlie Beck, lögreglustjóri í Los Angeles, sagði í morgun að rannsakað verður hvers vegna Dorner var vikið úr starfi og hvatti hann til að gefa sig sjálfviljugan fram.

Lögreglumenn leita nú að honum í fjallagarði í Kaliforníu, og eru meðal annars þyrlur og sporhundar notaðir í leitinni.