Tíu látnir eftir óveðrið

Að minnsta kosti tíu létust í hríðarveðrinu sem gekk yfir Austurströnd Bandaríkjanna og Kanada. Mörg hundruð þúsund eru enn án rafmagns og hafa íbúar á svæðinu verið beðnir um að vera ekki á ferðinni að óþörfu.

Þrír létust í Kanada og sjö í Bandaríkjunum, þar á meðal ellefu ára drengur í Boston. Sá var að hjálpa föður sínum að moka snjó, en hann fór inn í bíl þeirra feðga til að hlýja sér og varð þar fyrir koltvísýringseitrun.

Veðrinu vestanhafs hefur nú slotað en snjó kyngdi niður á sumum svæðum látlaust í um einn og hálfan sólarhring og fór vindhraði upp í allt að 34 metra á sekúndu.

Tæplega hálf milljón heimila og fyrirtækja er nú án rafmagns og hafa íbúar verið beðnir um að vera ekki á ferðinni að óþörfu enda er mikið fannfergi og á sumum stöðum hefur mælst allt að níutíu sentímetra jafnfallinn snjór.

Útlit er fyrir að snjórinn eigi eftir að bráðna hratt þar sem hlýna á næstu daga og óttast margir flóð og hefur einhverjum íbúum í Massachusettes verið gert að yfirgefa heimili sín vegna þessa.

Fjöldi ökumanna sat fastur á hraðbraut í konnettikött í nótt og voru nokkrir fluttir á sjúkrahús vegna ofkælingar

. Yfir fimmþúsund flugferðum var aflýst í gær vegna óveðursins og útlit er fyrir að einhverjar tafir verði á flugumferð í dag.

Vél Icelandair frá New York lenti í Keflavík í morgun en ekkert hefur verið flogið frá Boston, en vél flugfélagsins til borgarinnar fór í loftið nú rétt fyrir hádegi.