Hugðist leika eftir árásina í Columbine

Sextán ára breskur unglingspiltur hefur verið ákærður fyrir að leggja á ráðin um að ætla að myrða nítján manns.

Pilturinn, sem er frá Loughborough í Leicesterskíri, hafði útbúið lista með nöfnum nítján einstaklinga sem hann hugðist myrða.

Lögreglan fann sprengjuefni á heimili piltsins. Hann hefur viðurkennt að hafa prófað sig áfram með efnið en neitar alfarið að hafa lagt á ráðin um morð.

Pilturinn, sem er með Asperger-heilkenni, kom fyrir dómara í dag. Á nafnalistanum mátti meðal annars finna nöfn samnemenda hans og kennara. Þá er hann einnig talinn hafa ætlað gera árás og mosku í nágrenni við heimili hans.

Á teikningum, sem fundust á heimil hans, má sjá hvernig hann hafði skipulagt árásina á svipaðan hátt og árásin sem gerð var í Columbine skólanum í Colarado árið 1999. Þar myrtu Eric Harris og Dylan Klebold tólf nemendur og einn kennara áður en þeir sviptu sig lífi.